Cydweithredfa newydd i leihau effaith heintiau C. diff ar gleifion

2 Gorffennaf 2025

Mae staff ar draws GIG Cymru wedi dod at ei gilydd gyda'r nod o leihau heintiau Clostridioides difficile (C. diff) a'u heffaith ar bobl.

Ymunodd timau o fyrddau iechyd ac ymddiriedolaethau â Pherfformiad a Gwella GIG Cymru mewn digwyddiad cyd-ddylunio ar-lein i sefydlu cydweithredfa ddysgu newydd a fydd yn mynd i'r afael â chyfraddau cynyddol o heintiau.

Bydd y Gydweithredfa Ddysgu C. diff, sy’n rhan o'r Bartneriaeth Gofal Diogel, yn galluogi timau mewn byrddau iechyd ac ymddiriedolaethau ledled GIG Cymru i nodi a gweithredu gwelliannau a fydd yn lleihau nifer yr achosion o C. diff a baich heintiau.

Bydd y gydweithredfa yn rhoi cymorth i newid ymddygiad gwella, wedi'i ategu gan wyddor gwelliant, ar gyfer timau mewn byrddau iechyd ac ymddiriedolaethau. Bydd cyfle hefyd i gydweithio a dysgu ar y cyd.

Nod y gydweithredfa yn y pen draw yw nodi ac ymgorffori gwelliannau cynaliadwy y gellir eu mabwysiadu'n eang ar raddfa fawr. Bydd yn gwneud hyn trwy archwilio'r materion cyffredin a'r heriau unigryw y mae byrddau iechyd ac ymddiriedolaethau yn eu hwynebu mewn perthynas â C. diff.

Wrth siarad yn y digwyddiad, dywedodd Rhiannon Jones, Dirprwy Gyfarwyddwr, Ansawdd, Diogelwch a Gwella yn Perfformiad a Gwella GIG Cymru:

“Mae effaith C. diff yn ddofn, ac yn cwmpasu cleifion, teuluoedd, staff, a’r system iechyd gyfan.

“Roedd yn gadarnhaol gweld y nifer oedd yn bresennol yn y digwyddiad cyd-ddylunio a’u hehangder. Mae hyn yn dangos ymrwymiad i’r ymdrech hon i wella. Rhannodd timau enghreifftiau o welliannau y maent yn gweithio arnynt ar hyn o bryd neu eisoes wedi'u rhoi ar waith a mewnwelediadau ar beth arall yr hoffent ei gyflawni. Mantais cael cydweithredfa ddysgu genedlaethol ar gyfer C. diff yw cael arbenigwyr ledled Cymru yn dod ynghyd i rannu, dysgu a gwella ochr yn ochr â'i gilydd. Bydd hyn yn gwella effeithiolrwydd ac effeithlonrwydd ac effaith ein gwaith.

“Mae heintiau’n digwydd pan fo pobl, prosesau a lleoedd yn croestorri â’i gilydd. Mae hyn yn golygu bod ein hagenda’n gymhleth ac yn newid yn gyson. Mae ein gwaith yn bwysig oherwydd gall pob haint arwain at niwed sy'n newid bywyd claf. Y tu ôl i bob achos o haint mae unigolyn, claf a theulu - sy’n aml yn profi ofn ac o bosib colled. Nid digwyddiad clinigol yn unig yw C. diff, mae'n stori am fywyd wedi'i newid, ymddiriedaeth wedi'i phrofi, a niwed y gellir ei atal weithiau.”

Y camau nesaf

Bydd Perfformiad a Gwella GIG Cymru yn gweithio gyda byrddau iechyd ac ymddiriedolaethau i lunio ffocws a chyfeiriad y gydweithredfa ddysgu.

Bydd cyfres o gyfweliadau ansoddol cychwynnol yn dechrau datgelu'r rhwystrau, y cyfleoedd a'r straeon go iawn a all sbarduno gwelliant ystyrlon ar draws lleoliadau gofal iechyd. Bydd y canlyniadau, ynghyd â mewnwelediadau o'r digwyddiad cyd-ddylunio, yn sicrhau bod y gydweithredfa’n adlewyrchu profiad a realiti rheng flaen.

Bydd timau hefyd yn cyflwyno prosiectau gwella posibl a fydd yn helpu i nodi'r heriau pwysicaf, ac yn tynnu sylw at le gall mewnwelediadau ymddygiadol bontio'r bwlch rhwng bwriadau da a newid parhaol.

Mae cyflwyno'r gydweithredfa ddysgu newydd yn nodi carreg filltir arwyddocaol i'r Bartneriaeth Gofal Diogel, sy'n cefnogi sefydliadau GIG Cymru i gyflawni blaenoriaethau ansawdd a diogelwch cenedlaethol ar draws eu systemau.

I gael rhagor o wybodaeth am y Bartneriaeth Gofal Diogel, yn cynnwys gwybodaeth am ei cham cyntaf a'r meysydd ffocws cyfredol, ewch i dudalennau gwe'r bartneriaeth.