Cyflwyno Hwb System Rheoli Ansawdd Newydd

Mae Gweithrediaeth GIG Cymru wedi cyflwyno adnodd newydd i gefnogi datblygu Systemau Rheoli Ansawdd (QMS) ar draws GIG Cymru.

Bydd yr Hwb System Rheoli Ansawdd (QMS) newydd yn rhoi adnoddau, offer a dysgu o ymarfer i unigolion a thimau i gefnogi eu hymdrechion i sefydlu QMS yn eu sefydliad, fel sy'n ofynnol gan y Ddyletswydd Ansawdd.

Mae'r hwb, a fydd yn esblygu yn unol ag anghenion sefydliadau dros amser, yn rhan o gyfres o adnoddau cymorth cenedlaethol sy'n cael eu darparu drwy lif gwaith Arweinwyr Dyletswydd Ansawdd y Bartneriaeth Gofal Diogel.

Bydd gweithgarwch yn y ffrwd waith yn cynnwys ymgynnull rhwydwaith dysgu QMS, creu prototeip i weithredu QMS ar lefel grŵp gofal neu gyfarwyddiaeth i dynnu sylw at ddysgu a llywio lledaenu ac ehangu, a chynnig sesiynau datblygu bwrdd a phecynnau datblygu staff.

Mae'r gefnogaeth yn cael ei chyflwyno yn dilyn cyhoeddi papur yn ddiweddar gan Weithrediaeth GIG Cymru yn rhannu dull sy'n seiliedig ar dystiolaeth y gall sefydliadau gofal iechyd ei ddilyn i ddatblygu System Rheoli Ansawdd.

Mae'r papur yn tynnu sylw at ddysgu a mewnwelediadau a gafwyd yn ystod proses pum mlynedd o ymchwilio, datblygu a phrofi fframwaith a methodoleg QMS newydd yn llwyddiannus.

Dywedodd Dom Bird, Cyfarwyddwr Cenedlaethol Dros Dro dros Ansawdd, Diogelwch a Gwella, Gweithrediaeth GIG Cymru: “Rydym yn falch o gyflwyno’r fersiwn gyntaf hon o’n Hwb System Rheoli Ansawdd newydd fel rhan o’r gefnogaeth ehangach rydym yn ei chynnig i sefydliadau ledled GIG Cymru.

“Bydd yr hwb newydd hwn yn tyfu dros amser i ddarparu adnodd cynyddol gynhwysfawr a gwerthfawr i unigolion a thimau sy’n awyddus i sefydlu systemau rheoli ansawdd, o fewn GIG Cymru a thu hwnt.

“Mae cydweithio â chydweithwyr ar draws GIG Cymru yn y misoedd nesaf i ymgorffori Systemau Rheoli Ansawdd effeithiol mewn amrywiaeth o leoliadau a chyd-destunau yn cynnig cyfle cyffrous i ddysgu ar y cyd. Bydd hynny’n darparu sylfeini cryf ar gyfer datblygu dealltwriaeth gyfunol o reoli ansawdd o fewn gofal iechyd, a fydd yn llywio cyflawni dull cadarn a chyson o’i roi ar waith ledled Cymru.”

Gallwch weld yr Hwb System Rheoli Ansawdd yma.

Os hoffech roi adborth am yr Hwb System Rheoli Ansawdd, trafod y gefnogaeth a gynlluniwyd drwy’r Bartneriaeth Gofal Diogel neu os oes gennych ymholiadau eraill, anfonwch e-bost at ein tîm ansawdd a diogelwch