Platfform rheoli gwelliannau yn llawn uwchraddiadau newydd

5 Mehefin 2025

Diolch i adborth gan ddefnyddwyr presennol, mae Hive, y platfform digidol sy'n mesur gweithgarwch gwella, wedi'i ddiweddaru, sy’n cynnwys nodweddion newydd i'w wneud yn fwy hygyrch.

Mae Hive wedi'i gynllunio gan gyfarwyddiaeth Ansawdd, Diogelwch a Gwella, Perfformiad a Gwella GIG Cymru  (a elwid gynt yn Gwelliant Cymru). Mae gan y platfform fwy na 400 o ddefnyddwyr byw, ac mae'r niferoedd yn cynyddu o wythnos i wythnos.

Mae'r tîm y tu ôl i Hive yn ymfalchïo yn yr hyn y maent yn ei wneud i adolygu adborth gan ddefnyddwyr yn barhaus a gwneud newidiadau a awgrymir lle bo'n bosibl. Maent wedi bod yn diweddaru'r platfform yn rheolaidd ers iddo gael ei lansio gyntaf ym mis Hydref 2024.

Mae'r llu o newidiadau newydd yn cynnwys y gallu i lanlwytho data prosiect torfol gan ddefnyddio Excel, rhywbeth a fydd yn gwneud olrhain data prosiect yn fwy di-dor i staff.

Dywedodd Dominque Bird, Cyfarwyddwr Cenedlaethol Dros Dro Ansawdd, Diogelwch a Gwella: “Rwyf mor falch o’r gwaith sydd wedi’i wneud yn Hive. Mae'r tîm wedi gweithio'n galed i ddatblygu'r platfform yn barhaus o'r adeg y cafodd ei awgrymu gyntaf fel cysyniad. Mae bellach yn cael ei ddefnyddio gan dros 400 o ddefnyddwyr ac mae'n parhau i gynyddu! Mae Hive am ddim i sefydliadau'r GIG felly rydym yn awyddus i ragor o staff ddefnyddio'r platfform i gasglu eu data prosiect. Gallwn ddysgu a rhannu oddi wrth ein gilydd wrth i ni ymgymryd â gwaith gwella tebyg ar draws byrddau iechyd ac ymddiriedolaethau.

“Yr adborth a dderbyniwyd gennym fwyaf gan ddefnyddwyr oedd yr angen i lanlwytho data prosiect fesul swp. Mae'r tîm wedi bod yn gweithio'n galed y tu ôl i'r llenni i wireddu hyn fel y gall defnyddwyr lanlwytho eu holl ddata prosiect ar unwaith gan ddefnyddio Excel, rhaglen y mae staff yn gyfarwydd â’i ddefnyddio.  Rydym wedi ymrwymo i weithredu ar adborth yn brydlon ac rydym yn annog defnyddwyr i barhau i rannu awgrymiadau gyda ni am y platfform.

“Mae ein ap wedi’i greu ar gyfer staff gan staff felly mae pob newid a wneir yn ystyried y defnyddiwr. Er enghraifft, rydym hefyd wedi cyflwyno nodwedd chwilio sy'n galluogi defnyddwyr i chwilio am dermau cyffredin fel y bydd pob prosiect a rhaglen sydd wedi'u tagio â'r termau hynny yn cael eu harddangos, sy’n ei gwneud hi'n haws dod o hyd i wybodaeth yn y system.

Yn ogystal â'r nodwedd chwilio a'r nodweddion lanlwytho data torfol, mae Hive yn galluogi defnyddwyr i ychwanegu eu prosiectau sy'n gysylltiedig ag arloesi, ac mae'r dudalen sbardunau wedi'i diweddaru i gynnwys rhyngwyneb sy’n haws ei ddefnyddio.

Er mwyn helpu staff i lywio’r platfform a’i nodweddion wedi’u diweddaru, mae cyfres o ganllawiau wedi’i llunio i ddefnyddwyr. Mae yna diwtorial fideo hefyd ar sut mae defnyddio Hive a'i brif nodweddion.

“Fe wnaethon ni lunio tri chanllaw gweledol i bobl i’w helpu i ddefnyddio’r platfform. Mae ein canllaw cychwyn cyflym yn ymdrin â hanfodion y platfform ac yn gweithredu fel man cychwyn gwych i'r rhai sy'n defnyddio Hive am y tro cyntaf. Mae ein canllaw defnyddiwr manwl yn mynd i fwy o ddyfnder ar sut mae creu a rheoli data prosiect ar y platfform. Rydym hefyd wedi creu canllaw ar gyfer gweinyddwyr sefydliadau sydd â chaniatâd penodol i greu a rheoli rhaglenni ar y platfform.

“Wrth i ni barhau i ychwanegu nodweddion newydd, byddwn yn parhau i addasu’r canllawiau i adlewyrchu’r newidiadau diweddaraf i’r platfform”, ychwanegodd Dom.

I gael rhagor o wybodaeth am Hive, sy’n cynnwys gwybodaeth fanylach am y diweddariadau diweddaraf a manylion arddangosiadau byw, ewch i’r dudalen SharePoint.