17/7/26
Mae’r Grŵp Safle Canser Gofal Sylfaenol yn parhau â'i ymdrechion i gryfhau’r cydweithio rhwng gwasanaethau gofal sylfaenol ac eilaidd, gyda'r nod o sicrhau bod cleifion canser yn derbyn gofal teg o ansawdd uchel ni waeth ble maen nhw'n byw.
Dywed Elaine Hampton, yr arweinydd clinigol a Gemma Eccles, y cyd-arweinydd a benodwyd yn ddiweddar, fod y Grŵp Safle Canser yn cydnabod y rôl hanfodol y mae timau gofal sylfaenol yn ei chwarae wrth wneud diagnosis, cefnogi a rheoli pobl y mae canser yn effeithio arnynt. Drwy ddod â gweithwyr gofal iechyd proffesiynol o bob cwr o Gymru ynghyd, mae'r grŵp yn darparu fforwm i drafod materion sy'n gysylltiedig â chanser sy'n effeithio ar ofal sylfaenol ac i nodi cyfleoedd i wella gwasanaethau.
Mae ei weithgareddau'n cynnwys cydweithio â'r trydydd sector, yn cynnwys cymunedau ymarfer Macmillan ac Ymchwil Canser y DU, a darparu addysg a hyfforddiant ledled Cymru ar gyfer gweithwyr proffesiynol gofal sylfaenol.
Mae'r grŵp hefyd yn gweithio i ddylanwadu ar arloesi mewn gofal canser mewn lleoliadau gofal sylfaenol, yn ogystal â chefnogi’r gwaith hwnnw.
Fel rhan o'i ddatblygiad parhaus, mae'r grŵp yn annog mwy o ymwneud gan staff nyrsio a gweithwyr proffesiynol perthynol i iechyd, ac yn cydnabod cyfraniad gwerthfawr y disgyblaethau hyn i ofal cleifion a'r llwybr canser ehangach.
Dywedodd Elaine a Gemma y byddai ehangu cyfranogiad amlddisgyblaethol yn helpu i gryfhau’r cydweithio, rhannu arbenigedd a gwella canlyniadau a phrofiadau ymhellach i gleifion sy'n byw gyda chanser ledled Cymru.
Diolchodd Elaine a Gemma i Ruth Corbally, cyn-arweinydd Grŵp Safle Canser Gofal Sylfaenol. Roedd Ruth yn allweddol yn natblygiad Grŵp Safle Canser gofal sylfaenol ac mae ei hymrwymiad i'r grŵp wedi golygu ei fod wedi gallu symud ymlaen a chael effaith. Bydd Ruth yn parhau i ymwneud â’r Grŵp Safle Canser ac yn aelod gweithgar ohono. Mae'r tîm yn ddiolchgar iddi am ei hegni a'i brwdfrydedd parhaus wrth fynd i'r afael â gofal canser yng Nghymru.