Gwasanaeth Gwenwyndra Imiwnotherapi De-ddwyrain Cymru

Canolfan Ganser Felindre, Ymddiriedolaeth GIG Prifysgol Felindre

Cyflwyniad:

Lansiwyd Gwasanaeth Gwenwyndra Imiwnotherapi De Ddwyrain Cymru i fynd i'r afael â'r risg gynyddol o ddigwyddiadau niweidiol difrifol sy'n gysylltiedig ag imiwnedd (irAE) o imiwnotherapi canser. Gall y sgil-effeithiau hyn arwain at arhosiad yn yr ysbyty, niwed hirdymor, neu farwolaeth os na chânt eu hadnabod yn gynnar. Nod y gwasanaeth oedd cwtogi 50% ar dderbyniadau brys sy'n gysylltiedig ag IO a chefnogi 500+ o gleifion erbyn mis Mawrth 2025 trwy driniaeth ddydd.

Dulliau:

Wedi'i ariannu drwy raglen Gofal Brys ar yr Un Diwrnod Llywodraeth Cymru, defnyddiodd y tîm amlddisgyblaethol - yn cynnwys oncolegwyr, nyrsys clinigol arbenigol, a chymorth gweinyddol - gylchoedd PDSA i brofi a gwreiddio gwelliannau. Roedd y rhain yn cynnwys clinigau dan arweiniad nyrsys, sesiynau amlddisgyblaethol wythnosol, llwybrau atgyfeirio, ac addysg i weithwyr gofal iechyd proffesiynol. Roedd model prif ganolfan a lloerenni’n sicrhau cysondeb ledled De-ddwyrain Cymru. Mae dros 800 o gleifion bellach wedi defnyddio'r gwasanaeth.

Canlyniadau:

Llwyddodd y gwasanaeth i gyflawni gostyngiad o 65% mewn derbyniadau brys yn gysylltiedig ag IO, gan arbed tua £615,000. Gostyngwyd arosiadau ysbyty ar gyfer achosion difrifol o 14 i 9 diwrnod. Adroddodd cleifion am well parhad gofal, mynediad cyflymach at driniaeth, a llai o aflonyddwch i'w taith canser. Gwellodd hyder, morâl a chydweithio amlddisgyblaethol y staff. Mae'r gwasanaeth bellach yn cael ei ystyried yn fodel cenedlaethol o arfer gorau.

Gwersi a Ddysgwyd:

Roedd y gwersi allweddol yn cynnwys yr angen i gasglu data’n gynnar, llywodraethu cryf, ac amser arweinyddiaeth wedi’i ddiogelu. Roedd profion strwythuredig a chynnwys rhanddeiliaid yn helpu i sbarduno gwelliannau mesuradwy. Roedd yr heriau'n cynnwys diffyg adnoddau cychwynnol a diffyg seilwaith ffurfiol ar gyfer cipio data ac integreiddio digidol. Fodd bynnag, roedd y dull graddol yn galluogi newid a graddfa barhaus.

Beth nesaf?

Mae'r gwasanaeth bellach yn mynd i gyfnod strategol i ehangu i fodel rhanbarthol gwerth £800k erbyn 2027. Mae'r blaenoriaethau'n cynnwys cefnogi byrddau iechyd eraill i efelychu'r model, integreiddio offer digidol, gwella systemau data, a gwreiddio'r gwasanaeth o fewn llwybrau gofal canser Cymru. Nod y tîm yw llywio gofal gwenwyndra IO yn genedlaethol wrth gefnogi arloesi tebyg mewn triniaethau canser risg uchel fel CAR-T.