Gwerthusiad o'r Gwasanaeth Cyswllt Alcohol a Chwmpasu i Ddatblygu Gwasanaeth wedi'i Gyd-gynllunio sy'n Canolbwyntio ar yr Unigolyn i Fodloni Anghenion y Boblogaeth yn y Ffordd Orau

Bwrdd Iechyd Prifysgol Cwm Taf Morgannwg

Cyflwyniad:

Nod Bwrdd Iechyd Prifysgol Cwm Taf Morgannwg (BIPCTM) oedd trawsnewid ei Wasanaeth Cyswllt Alcohol yn Wasanaeth Gofal Alcohol (ACS) cynaliadwy, wedi'i gyd-gynllunio, sy'n canolbwyntio ar yr unigolyn, i ddiwallu anghenion poblogaeth yr effeithir arni'n anghymesur gan niwed ac amddifadedd sy'n gysylltiedig ag alcohol. Datgelodd data cenedlaethol a mewnwelediadau lleol fylchau sylweddol o ran mynediad, integreiddio a thegwch, gan ysgogi gwelliant brys.

Dulliau:

Dilynodd y prosiect egwyddorion Gofal Iechyd Seiliedig ar Werth (VBHC), gan ganolbwyntio ar gyd-gynhyrchu gyda phobl â phrofiad bywyd, ymgysylltiad system gyfan, ac ailgynllunio gwasanaethau dan arweiniad data. Roedd yn cynnwys mapio'r ddarpariaeth gwasanaeth gyfredol, cynnal sesiynau ymgysylltu â staff a defnyddwyr gwasanaeth, nodi bylchau mewn gofal, a datblygu Tîm Gofal Alcohol (ACT) 7 diwrnod integredig ar draws ysbytai a chymunedau BIPCTM. Arweiniodd ffrydiau gwaith strategol a gweithredol y prosiect ochr yn ochr â llywodraethu trylwyr drwy sianeli cenedlaethol a lleol.

Canlyniadau:

Ers ei weithredu, mae 1,789 o gleifion wedi cael cymorth ACT, gyda 394 o dderbyniadau i'r ysbyty wedi'u hosgoi a thros 3,900 o ddiwrnodau gwely wedi'u harbed - gan amcangyfrif bod £1.25 miliwn o gostau wedi’u harbed. Hyfforddwyd dros 200 o staff i wella sgrinio am alcohol, gan leihau stigma a gwella adnabod cynnar. Cododd cefnogaeth ar gyfer diddyfnu â chymorth meddygol o 4 i 61 o gleifion y mis. Mae 93% o gleifion bellach yn cael cymorth arbenigol o fewn 24 awr i gael eu derbyn i'r ysbyty, ac mae boddhad cleifion wedi cynyddu'n sylweddol.

Gwersi a Ddysgwyd:

Yn sgil cydgynhyrchu amserol ac ystyrlon a chydweithio amlasiantaethol, llwyddwyd i weithredu newid gwasanaeth wedi'i alinio â'r boblogaeth. Roedd cynnwys timau VBHC yn sicrhau darpariaeth holistaidd, sy'n canolbwyntio ar ganlyniadau. Datgelodd y prosiect heriau o ran cipio data ac amlygodd fod angen cefnogaeth gan uwch arweinwyr yn gynharach. Mae’r gwersi a ddysgwyd wedi llywio mathau eraill o arloesi gwasanaeth gan gynnwys gofal diabetes, dileu hepatitis, ac ymgyrchoedd Anhwylder Sbectrwm Alcohol y Ffetws.

Beth nesaf?

Bydd BIPCTM yn ehangu ymgysylltiad defnyddwyr gwasanaeth, yn graddio cyd-gynhyrchu ledled Cymru, ac yn arwain datblygiad y PROM a'r PREM cyntaf ar gyfer gofal alcohol. Bydd yr offer hyn yn ymgorffori llais y claf mewn gwelliant gwasanaeth amser real ac fe’u cynigir i'w mabwysiadu'n genedlaethol drwy'r Grŵp Gweithredu Cenedlaethol ar gyfer yr Afu.