Data wedi'i Ddatgloi: Mewnwelediadau Amser Real sy'n Grymuso Pob Nyrs

Bwrdd Iechyd Prifysgol Caerdydd a'r Fro

Cyflwyniad:

Nod Bwrdd Iechyd Prifysgol Caerdydd a'r Fro oedd cynyddu defnydd ystyrlon o ddata nyrsio 50% o fewn blwyddyn i gefnogi gwneud penderfyniadau clinigol hyderus sy'n seiliedig ar dystiolaeth. Cyn hyn, roedd data'n dameidiog, heb ei ddefnyddio'n ddigonol, ac wedi'i ddatgysylltu oddi wrth ymarfer dyddiol, gan adael nyrsys heb fewnwelediad prydlon i reoli risgiau, staff a gofal cleifion yn effeithiol.

Dulliau:

Cafodd dadansoddwr data ei wreiddio o fewn y tîm Nyrsio Corfforaethol, gan ddisodli'r model dadansoddeg canolog traddodiadol. Gan ddefnyddio dull ystwyth, sy'n canolbwyntio ar y defnyddiwr gyda nifer o gylchoedd PDSA, cyd-ddyluniodd y tîm ddangosfyrddau rhyngweithiol a oedd yn canolbwyntio ar ddata staff nyrsio. Defnyddiodd y dangosfyrddau hyn iaith nyrsio gyfarwydd ac fe'u lluniwyd gan fewnbwn rheng flaen i sicrhau defnyddioldeb a pherthnasedd. Roedd gweithdai, adborth iterus, a chydweithio ar draws timau yn cefnogi datblygiad a pherchnogaeth gyflym.

Canlyniadau:

Rhagorwyd ar y targed twf o 50% ar gyfer defnyddio’r dangosfwrdd, gan godi i dros 1,400 o edrychiadau misol, ac fe’i gwreiddiwyd mewn ymarfer nyrsio dyddiol. Mae'r canlyniadau allweddol yn cynnwys:

• Gostyngiad o 50% mewn gwariant asiantaethau, gyda phenderfyniadau sy'n seiliedig ar ddata yn cynnal ansawdd gofal.
• Gostyngodd un ward nifer y cwympiadau cleifion o gyfartaledd o bump i 2.5 y mis yn dilyn cynnydd mewn nifer y staff a oedd wedi'i lywio gan ddata.
• Mae nyrsys wedi crybwyll gwell hyder, perchnogaeth a gwelededd wrth gynllunio'r gweithlu.
• Daeth dangosfyrddau yn offeryn dibynadwy ar gyfer uwchgyfeirio, wedi’u defnyddio o lefel ward i lefel weithredol.

Gwersi a Ddysgwyd:

Nid o argaeledd data y daw gwir effaith, ond o ymddiriedaeth, mynediad a defnyddioldeb. Roedd gwreiddio dadansoddwr data yn uniongyrchol o fewn y tîm nyrsio yn galluogi aliniad dwfn ag anghenion clinigol. Roedd cyd-ddylunio yn hanfodol, a byddai cynnwys nyrsys yn gynharach yn y broses wedi gwella defnyddioldeb ac ansawdd data o'r cychwyn cyntaf. Drwy gynnal ffocws dan arweiniad nyrsys, cadwyd hygrededd a pherthnasedd.

Beth nesaf?

Mae'r tîm yn ehangu dangosfyrddau i gefnogi blaen-gynllunio, achredu, a thriongli gyda ffynonellau data ehangach. Wedi'i gydnabod gan Sefydliad Calon y Ddraig, mae'r model bellach yn cael ei rannu ar draws GIG Cymru i hyrwyddo gwelliant digidol dan arweiniad nyrsys.