Os ydych chi'n feichiog ac yn byw gyda diabetes, mae llawer y gallwch chi ei wneud i gadw'ch hun a'ch babi yn iach, p'un a oedd eich beichiogrwydd wedi'i gynllunio'n ofalus neu'n hollol annisgwyl.
Mae llawer o fenywod yn teimlo cymysgedd o gyffro a phryder, ac mae hynny’n gwbl normal. Yr hyn sy'n bwysig nawr yw cael y gefnogaeth gywir cyn gynted â phosibl. Cysylltwch â'ch tîm gofal iechyd cyn gynted â phosibl i roi gwybod iddyn nhw.
Yn ystod beichiogrwydd, mae cadw lefelau glwcos y gwaed o fewn yr ystod a argymhellir yn helpu i leihau’r risg o gymhlethdodau. Bydd eich tîm diabetes mewn cysylltiad agos i'ch cefnogi gyda hyn.
Byddwch yn cael apwyntiadau amlach, gan gynnwys gwiriadau ar eich llygaid, arennau, a phwysedd gwaed, yn ogystal â sganiau manwl i wirio twf eich babi. Bydd eich tîm hefyd yn adolygu unrhyw feddyginiaethau rydych chi'n eu cymryd ar gyfer cyflyrau eraill i wneud yn siŵr eu bod yn ddiogel yn ystod beichiogrwydd.
Cofiwch, does dim disgwyl i chi reoli hyn ar eich pen eich hun.